मानसिंह बिश्वकर्मा
असोज १६
नेकपा (एमाले) पोलिट व्यूरो सदस्य गोकुल घर्तीमगर रोल्पाबाट प्रतिनिधी सभामा चुनावी मैदानमा उत्रिने भएका छन् । आज घर्तीले पे्रस चौतारी रोल्पाको आयोजनामा नेकपा (एमाले) पार्टी कार्यालय रोल्पामा भएको पत्रकार भेटघाट कार्यक्रममा यस्तो घोषणा गर्नुभएको हो । उहाँले भन्नुभयो ः‘ म नै लड्छु, पार्टी स्थायी कमिटीले निर्णय गर्न मात्रै बाँकी छ, त्यो मलाई नै टुङ्गो लगाउँछ ।”
घर्तीमगरले देश व्यापी रुपमा एमाले पहिलो शक्ति बन्ने दावी गर्दै त्यसका लागि देशभक्त र वामपन्थीहरुसंग तालमेल गर्न सकिने गरी पार्टीको निर्णय भएको समेत बताउनुभयो । विद्यार्थी राजनीतिबाट राजनीतिमा आवद्ध भएका घर्तीमगर हाल समानुपातिक सांसद समेत रहनुभएका छ ।
उहाँले रोल्पामा जनताको सेवा गर्ने इच्छा समेत रहेको जानकारी गराउँदै अब केही दिनमै प्रदेश सदस्य र समानुपातिक उमेदवारहरुको नाम समेत तय गरेर केन्द्रमा पठाउने बताउनुभयो ।
उहाँले संविधानसभाभन्दा बाहिर रहेका नेकपाका कार्यकर्ताहरुले पनि नयाँ नेपाल लिनका लागि योगदान गरेको बताउँदै संविधानबाट गणतन्त्र, धर्म निरपेक्षता, संघीयता, समानुपातिक सँस्थागत भइसकेकोले गर्दा अब खुल्ला राजनीतिमा आउनको लागि आग्रह गर्नुभयो ।
उहाँले वामपन्थीहरुको अन्तिम लक्ष्य भनेको समाजवाद, साम्यवाद भएकाले नेपालमा प्रजातान्त्रिक शक्ति र बाम पन्थीहरु धु्रवीकरणको आवश्यकता अनिवार्य एकता हुनुपर्ने बताउनुभयो ।
५ नं. प्रदेशको सदरमुकाम विभिन्न स्थानमा चर्चा भइरहेको बेलामा घर्तीमगरले ५ नं. प्रदेशको राजधानी दाङ घोराही नै हुने ठोकुवा गर्नुभयो ।
रोल्पाबाट प्रतिनिधी सभाको लागि माओवादी केन्द्रबाट वर्षमान पुनमगर र एमालेबाट गोकुल घर्ती चुनावी मैदानमा उत्रिने भएका छन् भने नेपाली कांग्रेसको पनि आजै टुङ्गो लगाउनको लागि बैठक जारी रहेको छ ।
एमालेबाट प्रदेश र समानुपातिकमा जिल्ला अध्यक्ष हरी घर्तीमगर, प्रदेश संगठन विभाग सदस्य कुमार दशौदी, राजकुमार कक्षपति, पृथ्वी प्रसाद रोकामगरको नाम चर्चामा रहेको छ ।
एमालेबाट रोल्पामा गोकुल घर्ती लड्ने चुनावमा देशभक्त, वामपन्थीसँग तालमेल हुन सक्छः घर्तीमगर
२०७४ आश्विन १६, सोमबार ११:११ गते