जिल्ला प्रहरी कार्यालय रोल्पाद्वारा चाडपर्वलाई मध्यनजर गर्दै एकीकृत सुरक्षा योजना सार्वजनिक

जिल्ला प्रहरी कार्यालय रोल्पाद्वारा चाडपर्वलाई मध्यनजर गर्दै एकीकृत सुरक्षा योजना सार्वजनिक

१५ असोज, लिबाङ ।
जिल्ला प्रहरी कार्यालय रोल्पाद्वारा चाडपर्वहरुलाई मध्यनजर गर्दै सुरक्षा योजना आज सार्वजनिक गरेको छ ।
कार्यालयले नेपालीहरुको ठूलो चाड वडादशै तथा दीपावली, छठ समेतलाई मध्यनजर गरी एकीकृत सुरक्षा योजना कार्यान्वयनमा ल्याएको जिल्ला प्रहरी कार्यालय रोल्पाका प्रमुख नवराज सुवेदीले बताउनुभयो । एकिकृत सुरक्षा योजनालाई जिल्ला भर लागु भएको घोषणा प्रमुख जिल्ला अधिकारी नवराज सापकोटाले गर्नुभई आजै जिल्ला प्रहरी कार्यालय अगाडी बसपार्कमा चाडपर्व लक्षित यात्रु सहायता कक्षको प्रमुख जिल्ला अधिकारीले सुभारम्भ समेत गर्नुभयो ।चारै वटा सुरक्षा निकाय परिचालन गर्न सक्ने रणनैतिक योजना सहित एकीकृत सुरक्षा योजना तय गरी जिल्ला विपद व्यवस्थापन समितिको बैठकबाट अनुमोदन समेत गरिएको थियो । जसमा नागरिकहरुलाई कानुनी शासनको प्रत्याभुति दिलाउन प्रभावकारी तवरले प्रहरी परिचालन गरी प्रहरी काम कारवाहीलाई उपलब्धिमुलक बनाउनु प्रहरीको (Line of Action)लाई स्पष्ट पारी जिल्लाभरका सम्पूर्ण प्रहरी इकाईहरुमा परिपत्र समेत गरिएको छ प्रहरी नायव उपरीक्षक नरेशराज सुवेदीले बताउनुभयो ।
साथै चाडपर्वको समयमा आउन सक्ने सुरक्षा चुनौती, संभावित घटनाहरुको समेत विश्लेषण गर्दै मुख्य व्यापारिक केन्द्रहरू, आर्थिक कारोवार हुने निकायहरू, नागरिकहरुले पूजापाठ गर्ने मठ मन्दिरहरुको समेत छुट्टाछुट्टै विवरण तयार पारी सुरक्षा निगरानी बढाउने सुरक्षा निकायले तय गरेको छ । योजना अन्तर्गत सार्वजनिक भाडाका सवारी साधनहरुको चेक जाँच तथा अनुगमन गरी तोकिएभन्दा बढि भाडा लिने, यात्रुहरुलाई हैरानी दिने, गाडीको सरसफाई नगर्ने, कोरोना भाइरसबाट बच्नका लागि स्वास्थ्य मापदण्ड पालना नगर्ने, सवारी साधनको चालक, सहचालक तथा संचालक समेतलाई कारवाही समेत सुरक्षा निकायले तयारी गरेको छ ।

त्यसैगरी कार्यालयले विशिष्ट व्यक्तिको सुरक्षाको लागि समेत प्रहरी खटाउने, कानुनले निषेध गरिएका जुवा, तास खेल्ने, पटका पड्काउने, अवैध मदिरा विक्री वितरण गर्ने, कालोबजारी गर्ने, म्याद सकिएको खाद्यन्न बिक्री गर्ने व्यक्तिहरू उपर कडा कारवाही गर्ने, चाडपर्वलाई खुशी र उल्लासमय तवरले मनाउन सक्ने वातावरण बनाउन प्रहरीले हदसम्भव प्रयास गर्ने भएकोले कोभिड–१९ महामारी समेतलाई मध्यनजर गरी अनावश्यक भीडभाड तथा हुलहुज्जत नगरी सहजपुर्वक पारिवारिक जमघट गरी रमाईलोसँग चाडपर्व मनाउन तथा चाडपर्वको समयमा कुनै अप्रिय घटनाहरू घटे तुरुन्त नजिकको प्रहरी कार्यालयमा जानकारी गराउन जिल्ला प्रहरी कार्यालय प्रमुख नरेशराज सुवेदीले अनुरोध गर्नुभएकोे छ ।