सडक विस्तारमा सिंचाई कुलोमा क्षतिपछि बाजबाङका १७ घरधुरी वर्षे धान लगाउन नपाइने हो कि भन्ने चिन्ता
रोल्पा समाचारदाता
लिबाङ–रोल्पा
रोल्पा, रोल्पा नगरपालिका ५ नं. वडा बाजबाङमा सडक विस्तारपछि १७ घरधुरी नयाँ सडक खन्ने क्रममा सिँचाइ कुलोमा क्षति पु¥याएपछि सोही ठाउँका १७ घरधुरीे वर्षे धान लाउन नपाइने हो कि भन्ने चिन्तामा छन् ।
सोही ठाउँका १७ घरधुरीबाट रु १० देखि रु २५ हजारसम्म पैसा उठाएर स्काभेटर लगाउँदा पनि कुलोमा पानी नआएपछि अहिले स्थानीय आफै कुलो मर्मत कार्यमा जुटेका छन् । वर्षे धान लगाउने समय नजिकिदै गर्दा कुलोमा पानी नआएपछि यस वर्ष पनि खेत बाँझै हुने कृषक टेक बहादुर महराले बताउनुभयो । किमीचौर–माडिचौर सडकको ट्रयाक खोल्ने क्रममा माडीखोलाबाट बाजबाङ गाउँमा जाने ३ वटा सिंचाई कुलोमा क्षति पुगेको छ । सडक विस्तार क्रममा ओडार्ने सिंचाइ कुलो, सेसिघाट सिंचाई कुलो र धाङकुना सिंचाई कुलो समयमै मर्मत हुन नसक्दा एक वर्षेदेखि यहाँको ५ सय रोपनी खेत बाँझै रहेको कृषक सुवाष घर्तीले चिन्ता व्यक्त गर्नुभयो । खेतको मोहीवालाले पैसा उठाएर स्काभेटर लगाउँदा पनि कुलोमा पानी नआएको उहाँले बताउनुभयो । उहाँले यस वर्ष पनि हामीले धान लगाउन पाएनौं भने त के खाने, बालबच्चा कसरी पाल्ने भन्दै गुनासो व्यक्त गर्नुभयो । सडक निर्माण गर्दा भएको क्षतिका विषयमा वडा कार्यालय, नगरपालिका र सिंचाई डिभिजन कार्यालयमा पटक–पटक जानकारी गराउँदा पनि कतैबाट सुनुवाई नभएको कृषक आइतराम घर्तीको गुनासो व्यक्त गर्नुभयो ।