नगर प्रमुख पुर्ण के.सी. नगरबासीको गुनासो सुन्न घर दैलोमा

नगर प्रमुख पुर्ण के.सी. नगरबासीको गुनासो सुन्न घर दैलोमा
असोज २१ गते
लिबाङ–रोल्पा

रोल्पा नगरपालिकाका नगर प्रमुख पुर्ण के.सी. जनताको गुनासो सुन्न नगरबासीको घर दैलोमा पुग्नुभएको छ । नगरबासीको गुनासो सुन्ने क्रममा उहाँले आज ६ नं. वडामा पुग्नुभएको हो ।

आर्थिक वर्ष २०७६÷२०७७ मा सम्पन्न योजना तथा कार्यक्रमको नगरबासीको गुनासो सुन्नका लागि नगर प्रमुख के.सी.ले प्रमुख प्रशासकीय अधिकृत मोहन पौडेल र योजना अधिकृत सुदिप डाँगीलाई साथमा लिएर नगरबासीको गुनासो सुन्न घर दैलोमा पुग्नुभएको छ । उहाँले नगरपालिकाको दुर दराजका बस्तीमा पुगि जनताको राय सुझाव तथा गुनासो सुन्नुका साथै विकास निर्माण योजनाहरु कसरी कार्यन्वय भइरहेका छन् र सुधार गर्नुपर्ने कुराहरु नगरबासीको राय बुझ्न घर दैलोमै पुग्दै हुनुहुन्छ । निश्चित् अवधिको कार्य योजना नै बनाएर गत सोमबारबाट जनताको घर दैलोसम्म पुग्ने र गत आ.व.मा सम्पन्न भएका योजनाहरुको पहिचान र अनुगमन गर्ने, योजनाहरुमा दोहोरोपना हुन नदिने, उपभोक्ता समिति गठनमा हुनसक्ने समस्यालाई निरीक्षण गरि नियमण गर्ने, योजना तथा कार्यक्रबाट प्राप्त लाभ बारे उपभोक्ता नगरबासीको राय बुझ्ने, वडामा विनियोजत नयाँ योजना र सम्पन्न भएका योजनाहरुमा हुने दोहोरोपना रोक्ने तथा वडा कार्यालयहरु र समग्र नगरपालिकाको सेवा प्रवाह बारे नगरबासीको सन्तुष्टि मापन गर्ने कार्यका लागि आफै नगरबासीको घर दैलोमै उहाँ पुग्दै हुनुहुन्छ । यस नगरपालिकाको वडा नम्बर २, ४, ६ र ७ मा पहिलो चरणमा, वडा नम्बर ८, ९ र १० मा दोस्रो चरणमा र वडा नम्बर १, ३ र ५ मा तेस्रो चरणमा विभाजन गरेर चरणवद्ध नगरबासीको गुनासो सुन्ने सँगसँगै सम्पन्न योजनाहरुको अनुगमन तथा मूल्याङ्कन कार्यमा उहाँ आफै सक्रिय बन्नु भएको छ ।

उहाँले अकस्मात नगरबासीको आफ्नो घर दैलोमा सञ्चै हुनुहुन्छ ? र तपाईको समस्या के छ ? भनेर पुगेको देखेपछि नगरबासी अच्चम्मित र हर्षित भएका छन् । अनुगमनको क्रममा देखापरेका समस्याहरुलाई तत्काल समाधान गर्न के.सी.ले प्रमुख प्रशासकीय अधिकृत पौडेललाई सुझाउने समेत गरेका छन् । नगर कार्यपालिकाको कार्यालय र वडा कार्यालयहरुबाट हुने सेवा प्रवाहका प्रभावकारिता र चुस्तता कायम गरी जनतालाई वास्तवमै सरकारको उपस्थिति र सुशासनको प्रत्याभूति दिलाउन सो कार्य भइरहेको योजना अधिकृत सुदिप डाँगीले बताउनुभयो ।